കലയുടെ നിറച്ചാർത്തിൽ ‘താളം 2026’

 

എസ്.എൻ.വി.യു.പി.എസ്. ആളൂരിൽ ‘താളം 2026’ സ്കൂൾ കലോത്സവം  നടത്തി 

ആളൂർ: എസ്.എൻ.വി.യു.പി.എസ്. ആളൂരിൽ സംഘടിപ്പിച്ച ‘താളം 2026’ സ്കൂൾ കലോത്സവം വർണാഭമായ പരിപാടികളോടെ സമാപിച്ചു. സെപ്റ്റംബർ 14, 18 തീയതികളിലായി സ്കൂൾ ഹാളിലും എസ്.എൻ.ഡി.പി. സമാജം ഹാളിലുമായാണ് കലോത്സവം അരങ്ങേറിയത്.

കലോത്സവത്തിന്റെ ഉദ്ഘാടനം വാർഡ് മെമ്പർ ഐ.എൻ. ബാബു നിർവഹിച്ചു. സ്കൂൾ മാനേജർ ഇ.കെ. മാധവൻ അധ്യക്ഷത വഹിച്ചു. ഫസ്റ്റ് അസിസ്റ്റന്റ് ജൂലി എൻ.സി. സ്വാഗതം ആശംസിച്ചു. എസ്.എൻ.ഡി.പി. സമാജം സെക്രട്ടറി ഇ.വി. സുബ്രഹ്മണ്യൻ, പി.ടി.എ. പ്രസിഡന്റ് മിഥില സനീഷ് എന്നിവർ ആശംസകൾ നേർന്നു. സ്റ്റാഫ് പ്രതിനിധി ഹിബി സി.എ. നന്ദി രേഖപ്പെടുത്തി.

കെ.ജി., എൽ.പി., യു.പി. വിഭാഗങ്ങളിലെ വിദ്യാർഥികൾക്കായി വിവിധ കലാമത്സരങ്ങൾ സംഘടിപ്പിച്ചു. ഭരതനാട്യം, നാടോടിനൃത്തം, ഗ്രൂപ്പ് ഡാൻസ്, ഫാൻസി ഡ്രസ്, കവിതാലാപനം, ലളിതഗാനം, നാടൻപാട്ട് തുടങ്ങി നിരവധി ഇനങ്ങളിൽ കുട്ടികൾ ആവേശപൂർവം പങ്കെടുത്തു.

വിദ്യാർഥികളുടെ കലാപരമായ കഴിവുകളും സർഗാത്മകതയും പ്രകടിപ്പിക്കുന്ന മികച്ച വേദിയായി ‘താളം 2026’ മാറി. കുട്ടികളുടെ സജീവ പങ്കാളിത്തവും അധ്യാപകരുടെയും രക്ഷിതാക്കളുടെയും സഹകരണവും കലോത്സവത്തിന് മികവേകി.

നിറവാർന്ന ചടങ്ങുകളോടെ ആളൂർ S.N.V.U.P സ്കൂളിൽ അധ്യാപകദിനം ആഘോഷിച്ചു.

 ആളൂർ എസ്.എൻ.വി.യു.പി. സ്കൂളിൽ അധ്യാപകദിനം ആഘോഷിച്ചു

​ആളൂർ: സെപ്റ്റംബർ 5 അധ്യാപകദിനത്തോടനുബന്ധിച്ച് ആളൂർ എസ്.എൻ.വി.യു.പി. സ്കൂളിൽ വിപുലമായ പരിപാടികളോടെ അധ്യാപകദിനം ആഘോഷിച്ചു.
രാവിലെ നടന്ന പ്രത്യേക സ്കൂൾ അസംബ്ലി അധ്യാപകരാണ് നയിച്ചത്. പ്രധാനാധ്യാപകൻ റോണി മാസ്റ്ററുടെ പ്രാർത്ഥനയോടെയാണ് അസംബ്ലി ആരംഭിച്ചത്. തുടർന്ന് ശ്രുതി ടീച്ചറുടെ 'എന്റെ ഗുരുനാഥൻ' എന്ന കവിതയുടെ നൃത്താവിഷ്കാരവും സുഗന്ധി ടീച്ചറുടെ ഗാനാലാപനവും ഉൾപ്പെടെ അധ്യാപകർ അവതരിപ്പിച്ച വൈവിധ്യമാർന്ന കലാപരിപാടികൾ വിദ്യാർത്ഥികൾ കൈയടികളോടെ ഏറ്റെടുത്തു.
ചടങ്ങിൽ സ്കൂൾ മാനേജർ ഇ. കെ. മാധവൻ, പി.ടി.എ. പ്രസിഡന്റ് മിഥില സനീഷ് എന്നിവർ അധ്യാപകർക്ക് ആശംസകൾ നേർന്നു സംസാരിച്ചു. പി.ടി.എ.യുടെ നേതൃത്വത്തിൽ സ്കൂളിലെ മുഴുവൻ അധ്യാപകർക്കും പൂക്കൾ നൽകി ആദരിച്ചു.

അഞ്ചാം ക്ലാസ്സിലെ ദേവദത്ത്‌ എല്ലാ അധ്യാപകർക്കും ബോക്കെയും സ്വീറ്റ് ബോക്സും  സ്കൂളിലെ എല്ലാ കുട്ടികൾക്കും മിഠായികളും നൽകി.

വിദ്യാർത്ഥികൾ തങ്ങൾ സ്വയം തയ്യാറാക്കിയ വർണ്ണാഭമായ ആശംസാകാർഡുകൾ അധ്യാപകർക്ക് സ്നേഹോപഹാരമായി കൈമാറി.